പ്രശസ്ത പിന്നണി ഗായികയും പദ്മഭൂഷണ് ജേതാവുമായ വാണി ജയറാം (77) അന്തരിച്ചു. ചെന്നൈയിലെ വസതിയിലായിരുന്നു അന്ത്യം.
തമിഴ്, തെലുഗു, കന്നട, മലയാളം, മറാത്തി, ഹിന്ദി എന്നീ ഭാഷകളിലായി നൂറുകണക്കിന് ഗാനങ്ങള് ആലപിച്ചിട്ടുണ്ട്. മികച്ച ഗായികക്കുള്ള ദേശീയ ചലച്ചിത്രപുരസ്കാരം മൂന്നു തവണ നേടിയിട്ടുണ്ട്. ഇക്കഴിഞ്ഞ റിപബ്ലിക് ദിനത്തിലാണ് പദ്മഭൂഷണ് പുരസ്കാരം തേടിയെത്തിയത്.
തമിഴ്നാട്ടിലെ വെല്ലൂരില് 1945ലായിരുന്നു ജനനം. കലൈവാണി എന്നായിരുന്നു യഥാര്ഥ പേര്. സ്വപ്നം എന്ന ചിത്രത്തിലെ 'സൗരയൂഥത്തില് വിടര്ന്നൊരു' എന്ന ഗാനമാണ് മലയാളത്തില് അവര് ആദ്യം ആലപിച്ചത്.
സംഗീതജ്ഞയായ അമ്മയില് നിന്നാണ് വാണി ജയറാം സംഗീതം പഠിച്ചത്. എട്ടാം വയസ്സില് ആകാശവാണി മദ്രാസ് സ്റ്റേഷനില് പാടിത്തുടങ്ങി. 1971-ല് വസന്ത് ദേശായിയുടെ സംഗീതത്തില് 'ഗുഡ്ഡി' എന്ന ചിത്രത്തിലെ 'ബോലേ രേ പപ്പി' എന്ന ഗാനത്തിലൂടെ പ്രശസ്തയായി. ഗുഡ്ഡിയിലെ ഗാനത്തിനു അഞ്ച് അവാര്ഡുകള് നേടി. ചിത്രഗുപ്ത്, നൗഷാദ് തുടങ്ങിയ പ്രഗല്ഭരുടെ ഗാനങ്ങള് പാടിയ വാണി ജയറാം ആശാ ഭോസ്ലെക്കൊപ്പം 'പക്കീസ' എന്ന ചിത്രത്തില് ഡ്യുയറ്റ് പാടി. മദന് മോഹന്, ഒ.പി. നയ്യാര്, ആര്.ഡി ബര്മന്, കല്യാണ്ജി ആനന്ദ്ജി, ലക്ഷ്മികാന്ത് പ്യാരേലാല്, ജയ്ദേവ് തുടങ്ങിയവരുടെ സംഗീതത്തിനും ശബ്ദം നല്കി. മുഹമ്മദ് റഫി, മുകേഷ്, മന്നാഡേ എന്നിവരോടൊപ്പം പാടിയ അവര് 1974-ല് ചെന്നൈയിലേക്ക് തന്റെ താമസം മാറ്റിയതിനുശേഷമാണ് ദക്ഷിണേന്ത്യന് ഭാഷാചിത്രങ്ങളിലും സജീവമായത്.
