ഏകസിവില് കോഡിന്റെ പശ്ചാത്തലത്തില് സുന്നി ഐക്യം അനിവാര്യമാണെന്ന് മുസ്ലിം ലീഗ് അധ്യക്ഷൻ പാണക്കാട് സാദിഖലി ശിഹാബ് തങ്ങള്.
ഇരുവിഭാഗം സമസ്തയുടേയും ഐക്യ നിലപാടില് തുടര്നടപടികള് വേഗത്തില് സ്വീകരിക്കുമെന്നും മുസ്ലിം ലീഗ് നേരത്തേ തന്നെ ഐക്യത്തിനായി ശ്രമിച്ചിട്ടുണ്ടെന്നും അദ്ദേഹം പറഞ്ഞു.
'ഏക സിവില് കോഡിനെതിരെ സമാന മനസ്കരോടൊപ്പം പ്രതിഷേധവും നിയമനടപടികളും സ്വീകരിക്കും. ഏകസിവില് കോഡിന്റെ പശ്ചാത്തലത്തില് സുന്നി ഐക്യം അനിവാര്യമാണ്. ഭിന്നതകളൊക്കെ മാറ്റിവെച്ച് ഒറ്റക്കെട്ടായി ഒരൊറ്റ ശബ്ദത്തോടെ മുന്നോട്ടുപോവുക എന്നതാണ് ലക്ഷ്യം.
സുന്നി ഐക്യത്തിന് വേണ്ടി ശിഹാബ് തങ്ങളുടെ കാലത്ത് തന്നെ പ്രവര്ത്തനങ്ങള് നടത്തിയിരുന്നു. ജിഫ്രി മുത്തുക്കോയ തങ്ങളും സമാനമായ പ്രസ്താവന നടത്തിയതായി കണ്ടു. സന്തോഷം. ഇപ്പോള് അതിന്റെ അനിവാര്യ സന്ദര്ഭമാണ്. ഇനി ഇതിനുള്ള വേദിയൊരുക്കുകയാണ് മുസ്ലിം ലീഗിന്റെ ദൗത്യം'-സാദിഖ് അലി തങ്ങള് വ്യക്തമാക്കി.
