സംസ്ഥാനത്തെ റോഡുകളില് വാഹനങ്ങള്ക്ക് ഇനി പുതിയ വേഗപരിധി. സംസ്ഥാനത്തെ വേഗ പരിധി പുതിക്കിയുള്ള വിജ്ഞാപനം ഇന്ന് മുതല് പ്രാബല്യത്തിലായി.
ഇരുചക്ര വാഹനങ്ങളുടെ വേഗത്തിലടക്കം വലിയ വ്യത്യാസമാണ് വരുത്തിയിട്ടുള്ളത്. ഇരുചക്ര വാഹനങ്ങള്ക്ക് നഗര റോഡുകളില് 50 കിലോമീറ്ററും മറ്റെല്ലാ റോഡുകളിലും 60 മാണ് വേഗപരിധി. സംസ്ഥാനത്ത് 2014 ന് ശേഷം ഇപ്പോഴാണ് വേഗപരിധി പുനര് നിശ്ചയിക്കുന്നത്. സംസ്ഥാനത്തെ റോഡുകള് ആധുനിക രീതിയില് നവീകരിച്ചതും ക്യാമറകള് പ്രവര്ത്തനസജ്ജമായതും കണക്കിലെടുത്താണ് വേഗപരിധി പുതുക്കിയതെന്ന് ഗതാഗതമന്ത്രി ആന്റണി രാജു വ്യക്തമാക്കിയിട്ടുണ്ട്.
ഏറ്റവും പ്രധാനമായി അറിയേണ്ട 5 കാര്യങ്ങള്
1 ഇരുചക്ര വാഹനങ്ങള്ക്ക് നഗര റോഡുകളില് 50 കിലോമീറ്ററും മറ്റെല്ലാ റോഡുകളിലും 60 മാണ് വേഗപരിധി
2 മുച്ചക്ര വാഹനങ്ങള്ക്കും സ്കൂള് ബസുകള്ക്കും എല്ലാ റോഡുകളിലെയും പരമാവധി വേഗപരിധി 50 കിലോമീറ്ററായിരിക്കും.
3 ഒമ്ബത് സീറ്റ് വരെയുള്ള യാത്രാ വാഹനങ്ങള്ക്ക് 6 വരി ദേശീയ പാതയില് 110 കിലോമീറ്റര്, 4 വരി ദേശീയ പാതയില് 100, മറ്റ് ദേശീയപാത, 4 വരി സംസ്ഥാന പാത എന്നിവയില് 90 കിലോമീറ്റര്, മറ്റ് സംസ്ഥാനപാതകളിലും പ്രധാന ജില്ലാ റോഡുകളിലും 80, മറ്റു റോഡുകളില് 70, നഗര റോഡുകളില് 50 കിലോമീറ്റര് എന്നിങ്ങനെയാണ് അനുവദനീയ വേഗപരിധി.
4 ഒമ്ബത് സീറ്റിനു മുകളിലുള്ള ലൈറ്റ് - മീഡിയം ഹെവി യാത്ര വാഹനങ്ങള്ക്ക് 6 വരി ദേശീയ പാതയില് 95 കിലോമീറ്റര്, 4 വരി ദേശീയ പാതയില് 90, മറ്റ് ദേശീയപാതകളില് 85, 4 വരി സംസ്ഥാന പാതയില് 80 കിലോമീറ്റര്, മറ്റ് സംസ്ഥാനപാതകളിലും പ്രധാന ജില്ലാ റോഡുകളിലും 70, മറ്റു റോഡുകളില് 60, നഗര റോഡുകളില് 50 കിലോമീറ്റര് എന്നിങ്ങനെയാണ് പരമാവധി വേഗം അനുവദിച്ചിട്ടുള്ളത്
5 ചരക്ക് വാഹനങ്ങളുടെ വേഗപരിധി 6 വരി, 4 വരി ദേശീയപാതകളില് 80 കിലോമീറ്ററും മറ്റ് ദേശീയപാതകളിലും 4 വരി സംസ്ഥാന പാതകളിലും 70 കിലോമീറ്ററും മറ്റ് സംസ്ഥാനപാതകളിലും പ്രധാന ജില്ലാ റോഡുകളിലും 65 കിലോമീറ്ററും മറ്റ് റോഡുകളില് 60 കിലോമീറ്ററും നഗര റോഡുകളില് 50 കിലോമീറ്റര് ആയും നിജപ്പെടുത്തിയിട്ടുണ്ട്.
